$173日式放題新鮮又抵食

＊第一碟當然係刺身啦！賣相好又新鮮！

＊燒物熱辣辣送上，四款都好味，右上角的迷仔番薯好似燒黑的銀杏，細細粒好滋味。

＊壽司細細件，一口一件，唔覺飽滯。

＊再下一城，今次加埋手卷，不過真係好飽啦！

＊下午五點半，全店零人，後尾加多一枱五人客，就係我地兩枱包足全場啦！

＊石澗日本料理在寶勒巷裡面，唔算太難搵。

多得老友介紹，用128元團購左石澗的晚市日本放題，尋晚幫襯，果然唔錯呀！

我地食的係下午5:30至7:00時段，最初只得我地一枱，跟住都只係多一枱，所以全場好靜局，侍應多過顧客，服務好周到，密密幫我地換碟，而且每次落單後，只係幾分鐘之內便送上，前後我地落左六七次單，完全無漏單或要追單的情況出現，好值得讚賞！

至於食物方面，選擇極多，有刺身壽司炸物燒物一品料理甜品等，每張點菜紙都有好多款式；質素方面，亦無因為做團購客而將貨就價，刺身壽司好新鮮，尤其鍾意佢地將各款壽司整得細細件，就算試多幾款都唔會覺太飽滯；炸物燒物就熱辣辣送到，帆立貝，雞翼海蝦番薯都好美味。仲有甜品、雪糕（雀巢迷你杯）同汽水任飲，真係無得彈。雖然只有個半小時，但絕對時間充裕，大約一小時過後就last order，我地已經食到捧腹，結果每人只叫多兩條冰卷做甜品就收工啦！

連埋45元服務費，今餐每人共係173元，就可以食到如此豐盛的晚餐，實在超值！

石澗日本料理

地址：尖沙咀寶勒巷21-23A寶利商業大廈地庫

電話：2989 2345

嘉道理農場櫻花怒放

＊呢種叫鐘花櫻桃的櫻花，英文名稱叫Taiwan Cherry！

＊陽光普照，天氣清涼，最宜郊遊。

＊可愛的貓頭鷹。

＊兩棲類動物，但唔記得左叫咩名。

＊楓葉已近枯黃。

＊在凌霄徑附近，有好多株鐘花櫻桃，好似平日見慣的吊鐘花。

＊落山後，在溫室賞花。

＊在溫室內盛放的蘭花。

趁天氣好，同老友順遊大埔的嘉道理農場，希望欣賞滿山秋色。

記得舊年下午兩點先開始遊農場，結果上山上到半路就要上山，仲要疾走先趕及關門前離開。所以今次我地上午11點半左右已到達，希望多些時間邊行邊影相。

原本打算坐農場的Shuttle bus登上山頂，然後慢慢行返落山，可惜只剩下下午3點最後一班，結果我地決定用腳慢慢行上山，目的地係農場最高處－－觀音山。

陽光普照，天氣清涼，最宜郊遊。遊人唔算多，但比想像的多，而且大部分係龍友，個個裝備齊全，真係唔簡單。

雖然係冬天，但農場好多鮮花盛開，反而楓葉已經枯黃，秋色與春色交替出現，景致很不錯呀！

一直行，不斷上長命斜，沿途見不少人氣來氣喘，步速亦快，原來佢地的目標係追櫻！！唔講唔知，原來農場近觀音山山頭的凌霄徑，種左一種名為鐘花櫻桃的櫻花，英文名稱叫Taiwan Cherry！

到達凌霄徑，果然見有唔少鐘花櫻桃，其有幾株仲已經盛放之中，有唔少人不斷影影影，我地都唔執輸。

影完櫻花，雖然只差少少便到達觀音山，但見時間已近3點，決定折返。結果，我地差不多4點半返回大門入口，足足玩左五個小時先至離開，好夠皮啦！

嘉道理農場暨植物園
前往方法：由元朗坐64K巴士，在嘉道理農場下車，車程約45分鐘
收費：門票30元；Shuttle bus 10元
網址：www.kfbg.org.hk/kfb/homepage.xml

跨年超值沖繩遊（七）：那霸市內購物熱點

＊國際通內的平和通商店街係那霸市內的購物熱點之一。

＊在國際通內有多間分店的鹽屋出售的海鹽軟雪糕一定要試，超滑又濃郁！

＊國際通街道兩旁充斥大量沖繩土產店，要買手信不妨行多幾間。

＊新都心的Naha Main Place購物商場，有餐廳、時裝店同超市，係我地每晚必到的景點之一。

＊Aeon百貨在小祿站有行人天橋直達好方便。

＊小祿站旁的JUSCO（即Aeon）內有food court，

呢間章魚小丸子店係人龍食店，超多人排隊。

＊我同朋友食章魚小丸子加炒麵做午餐，好味道。

＊我買的戰利品，九成以上都係零食和手信。

＊唯一一件衫，見半價就買左佢啦～

由於遊玩的日子唔多，我地主要去左牧志站至縣廳前站的國際通、Omoromachi站的新都心Naha Main Place同埋小祿JUSCO（即Aeon）那霸店逛街兼購物，三處都在單軌車站附近，易搵又易行。

（一）國際通　買手信必到熱點

＊國際通：我地由單軌車牧志站開始，一直逛到縣廳前站，橫跨三個站的國際通加平和通商店街係買手信的好地方，國際通整條直街兩旁充斥著各式各樣的沖繩土特產店，有工藝品、手信及食物等，仲有唔少餐廳，其中最多的係標榜食石垣牛的料理店。

另外一條位於國際通內的有蓋平和通商店街，裡面四通八達，又係充斥著土特產店，必逛店舖之一就係鹽屋，裡面有超過100多種的沖繩鹽製品，我地買左唔少鹽製品做手信之外，仲試左海鹽軟雪糕，第一啖有少少鹽味，然後就係濃滑的奶味，380日圓，超正。牧志公設市場亦在平和通內，有好多新鮮海產出售，類似東京築地市場。

國際通前往方法：牧志站、榮美橋站、縣廳前站均可以步行往國際通

（二）吉之島　百貨餐飲樣樣齊

＊JUSCO（即Aeon）那霸店：在小祿站旁，裡面除有food court（必吃食店係築地人氣章魚小丸子同炒麵）之外，仲有不少店舖值得行，而且適逢元旦，好多大大個超值福袋選擇，朋友就用10,000日圓買左個adidas福袋，內有一套運動服，一件外套，一件T恤同一頂帽，總值超過30,000日圓，尺碼合身，顏色亦合意，朋友頻呼好抵！

JUSCO（即Aeon）那霸店前往方法：連接小祿站，有天橋直達

（三）新都心Main Place　慢慢掃貨到凌晨

＊Naha Main Place：由Omoromachi站步行約10分鐘，由於在東橫INN附近，而且營業至凌晨，所以我地每晚都去打個轉。裡面有餐廳、超市、電器店同時裝店，我就鍾意逛超市，仲買左大量零食添。呢度的店舖亦有唔少福袋供應，朋友又買左10,000日圓的福袋，內有等值逾30,000日圓的物件，同樣係佢心頭好！

新都心Naha Main Place前往方法：Omoromachi站步行約10分鐘

跨年超值沖繩遊（六）：沖繩一日遊有玩有食有野買

＊萬座毛好壯觀。

＊我的自助午餐。

＊今次行程的亮點－－美麗海水族館。

＊如此闊銀幕的水底畫面，實在震撼。

＊遊人仲可以親手摸摸可愛的海星。

＊館外仲有免費海豚表演。

＊另一場海豚表演，透過玻璃近距離觀看，感覺又幾特別！

 ＊今歸仁遺跡的入口。

＊今歸仁遺跡有少少似南美的馬丘比丘。

＊最後一站係名護菠蘿園，盡情試食菠蘿食品，抵！

朋友出發做足資料搜集，揀左呢個既提供美麗海水族館，又去萬座毛同今歸仁世界遺產的一日遊，團費只係5,500日圓（另自費購買1,650日圓美麗海水族館門票），折合約465港元，已經包埋一餐海景自助午餐，就由早上8:45一直玩到下午6:30，實在抵到笑！

行程由南向北遊玩，車程較長，主要四個景點連自助午餐，詳情如下：

＊萬座毛：位於沖繩本島西海岸恩納村的國家自然公園。「萬座毛」的由來為「可供萬人齊坐的草原」，「毛」在沖繩指的是原野。此外，仲有隆起好似象頭般的珊瑚斷岩絕壁，非常壯觀。可惜參觀時間只有20分鐘，仲要齊齊拍團體照，結果急急腳影下相就要上番車，無得好似韓劇《沒關係，是愛情啊》中男女主角可以在萬座毛上奔跑，更加唔慢慢細看無敵海景，實在好失望。

＊沖繩美之海伊薩渡假酒店自助午餐：呢餐團體自助餐唔欺場，食物種類算多，而且對住海景開餐，無得彈！

＊海洋博公園（美麗海水族館等）：水族館就位於餐廳五分鐘腳程，導遊俾兩個半小時食午餐連參觀水族館，時間好充裕。美麗海水族館可以話係整個行程的亮點，亦係沖繩必遊的景點，擁有全球第二大的水槽，其中必睇的當然係鎮館之寶－－鯨鯊，透過世界最大的亞克力玻璃牆睇鯨鯊游弋，實在好震撼！戶外仲有近距離的海豚表演，同樣好值得睇！

＊今歸仁城遺跡：今歸仁城係14世紀統一王國成立前的三山時代北山國的主要城堡。今歸仁城跡以主城為中心擁有9個城郭。城堡規模堪比首里城，城牆長達1.5公里。從城牆上眺望很壯觀，可以看到今歸仁村一帶的國神群山，以及碧綠大海中的島嶼。

＊名護菠蘿園：菠蘿是沖繩的特產之一，在菠蘿園可以試食到數以十種菠蘿產品，包括新鮮菠蘿、菠蘿酒、菠蘿朱古力、菠蘿蛋糕、菠蘿薄餅、菠蘿罐頭、菠蘿炭香皂等菠蘿產品之外，仲有辣椒油苦瓜乾、黑糖蛋糕和青檸飲料等沖繩特產，就算唔幫襯，齋試食都食到飽，抵！

返抵那霸巴士總站，已經下午6:30，呢個一日遊好夠皮。

沖縄バス株式会社

地址：沖縄縣那霸市泉崎1-10-16（旭橋站的那霸市巴士總站旁）

電話：098-861-0083

網址：http://okinawabus.com（日本語／英語／簡體中文／韓語）

電郵：kankou@okinawabus.com

＊我地參加的是定期觀光巴士B路線美麗海水族館及今歸仁城址（費用5,500日圓，不包水族館入場費）

＊沖繩美麗海水族館的入館費（原價1,850日圓，可在出發當日直接在旅行社辦公室購買，只需1,650日圓）

跨年超值沖繩遊（五）：參觀沖繩新年慶典

＊元旦日，首里城舉行新春慶典，吸引好多當地人同遊客前來。

＊首里城新春之宴1月1日至3日舉行，重現古琉球繁盛時代的傳統新年慶典。

＊首里城茶室有單張介紹琉球宮廷點心。

＊用300多日圓品嘗的琉球宮廷點心配香片茶。

＊護國神社充斥著大量前來參拜的當地人。

＊護國神社周圍有不少熟食攤檔。

＊護國神社內的人頭湧湧。

＊祈福的吉祥物品。

第二日（一月一日元旦日），適逢日本人過新年，我地早上先去首里城參觀新春慶典。首里城係琉球式城堡，從15世紀至19世紀是琉球國的都城所在地和王宮。首里城新春之宴1月1日至3日舉行，重現古琉球繁盛時代的傳統新年慶典。

欣賞完慶典後，我地仲去埋茶室享用香片茶配琉球宮廷點心，點心包括花形烘糕、光餅、雞蛋糕、桃酥等，坦白講，味道普通，勝在環境清幽雅致，在日式和室內享用300多日圓來食環境都好超值。

下午再去埋護國神社再湊熱鬧。每逢新年，護國神社係縣內祭拜人數最多的神社，當日所見，神社參拜人數極多，需要實施人流管制，周圍有唔少熟食攤檔，同埋售賣祈福吉祥產品的店舖。身處其中，感受新年熱鬧氣氛之餘，也希望沾點旺氣啦！

首里城

前往方法：首里站步行約15分鐘

護國神社

前往方法：從奧武山公園站・壺川站下車後約步行5分鐘

跨年超值沖繩遊（四）：日本料理好抵食

＊Naha Main Place一樓的和風亭係我地兩晚的醫肚地方。

＊我的除夕晚餐：海鮮飯定食，魚生好多又新鮮。

＊食完海鮮定飯定食，再來一個宇治金時刨冰做除夕甜點，好滿足。

＊和風亭再食元旦晚餐：今次係小海鮮飯加天婦羅，同樣好豐富。

＊元旦夜，又點可以唔食當地甜品，類似湯丸加紅腰豆，可惜糖水太甜啦！

＊和風亭三款冬日限定的定食，價錢都係2,000日圓或以下，實在好抵食。

＊百甕（Momogahmi）居酒屋的晚餐小食：紅薯天婦羅（前）和炒苦瓜（後）。

＊百甕（Momogahmi）居酒屋的晚餐小食：青木瓜絲春卷。

＊百甕（Momogahmi）居酒屋的沖繩麵（Okinawa Soba）。

＊百甕（Momogahmi）居酒屋位於二樓的門口。

呢幾日，餐餐都係食日本料理，其中兩餐晩餐都係在新都心Naha Main Place的一樓和風亭解決。據我地觀察所得，和風亭人氣指數極高，而且定食價錢相宜（約1,500左右），最正係醫完肚後可以即時購物好方便。

我兩餐都係食佢地的冬季限定的套餐，第一餐係海鮮飯定食，有大大碗魚生飯（魚生包括魚籽、帶子、吞拿魚、三文魚、蝦等）、茶碗蒸同味噌湯，海鮮新鮮又豐富，白飯軟熟帶微溫，價錢連稅只係1,490日圓，抵。

第二日就揀左另一個海鮮小飯連天婦羅定食，今次海鮮飯雖然細碗，但依然好足料，都有魚籽、帶子、吞拿魚、魷魚等，同樣有茶碗蒸同味噌湯，依然水準唔錯，價錢連稅1,382日圓，又係抵。

和風亭

地址：新都心Naha Main Place一樓

前往方法：由單軌車Omoromachi站步行約10分鐘

至於第三日的晚飯，就在國際通的百甕（Momogahmi）居酒屋解決。餐廳位於二樓，要除鞋內進，仲要坐榻榻米，不過見人氣指數幾高，而且供應的是沖繩食品，辛苦Ｄ跪坐都值得啦。

我地點的除左每人一碗沖繩麵（Okinawa Soba）之外，仲有幾款沖繩小食包括炒苦瓜（連雞蛋豆腐同炒，苦瓜較香港的爽口，甘甘地，幾好味）、紅薯天婦羅（唔配天婦羅豉油，改沾海鹽同吃，乾食，另有一番風味）、木瓜絲春卷（有Ｄ似泰式米卷，沾醬汁同吃，好清新）、豆腐（質感和味道都比香港的濃而厚，豆香無得頂），至於沖繩麵的湯底清而略帶油，配料包括魚片同豬肉，賣相和味道較平實，我都係鍾意東京同北海道風味的拉麵多些。

埋單計，四個人只係6,000日圓，都係好便宜。

國際通的百甕（Momogahmi）居酒屋

地址：Ryukyu central building 2F, 1-2-25, Makishi, Naha-shi, Okinawa, 900-0013

前往方法：由單軌車牧志站國際通方向步行約10分鐘