藍天碧海 尋找烏溪沙浪漫心形石堆

由於潮退關係，離遠已經見到心形石堆和「祝福你」三個字的石堆。

近長堤處，先有一個老翻心形石堆，唔知係邊個經手呢？

心形石堆清晰浮現岸邊。

右手邊就係辛勤工作的吳伯了。

岸邊好多白鴿，遇有路人餵飼，立時群鴿亂舞，好似拍緊吳宇森的電影咁！

碼頭長堤處，有人釣魚，有人歇息，有人剛游完水上岸。

到達正式的烏溪沙沙灘，岸邊泊滿舢舨，遊人同樣唔多，感覺好寧靜。

馬鞍山公園的海濱長堤，同樣好少人，坐在長椅上休息，海風吹來，超爽！

秋高氣爽的日子最宜郊遊，今日的目的地係馬鞍山烏溪沙沙灘的心形石堆！

好多報紙都報道過呢個心形石堆，據說係由康樂及文化事務署退休花王吳伯以義工身份不斷執石砌石，在沙灘上砌出呢個心形石堆。

為免潮漲睇唔到心形堆，朋友預先到天文台睇左潮汐漲退時刻表，知道早上10點至中午12點退潮。於是早上在大圍吃過早餐後，就佳馬鐵前往烏溪沙。可惜誤信網上博客的資料，坐到終站－－烏溪沙站下車，結果出閘問人後，才知其實應該在馬鞍山站下車，在A出口出閘，穿過馬鞍山廣場下天橋，再經馬鞍山公園向右行，不遠處就可以睇到烏溪沙沙灘以及心形石堆。

到達時大約十點幾，潮水已退，心形石堆完全露出海面，難得遊人唔多，只有兩個耍八段錦的男女，同朋友影夠相後，坐在樹蔭下傾傾講講，加上海風送爽，好舒服。坐得差不多，就繼續前行，沿途唔少白鴿，遇上有路人餵食，立時飛撲聚在一起，數量不少，蔚為奇觀。到達碼頭長堤，近岸海水清澈，見到唔少魚仔游來游去，亦好三幾個健碩的叔叔伯伯暢泳其中，幾優游自在。到達正式的烏溪沙沙灘，岸邊泊滿舢舨，遊人同樣唔多，感覺好寧靜。

四圍行行坐坐，1點幾後再折返心形石堆，終於見到傳說中的吳伯，正在打理業務－－執整石堆和垃圾，一邊將沖散的石頭拋回石堆之中，一邊又執起沙灘的垃圾，真的好有心機。

差不多2點，潮水仍只係微漲，始終睇唔到潮水圍著心形石堆的景致，不過都坐得好夠皮，所以決定打道回府，完成左呢三個幾鐘頭的烏溪沙之旅！

烏溪沙沙灘心形石前往方法

在大圍鐵路站坐馬鐵至馬鞍山站，在A出口出閘，穿過馬鞍山廣場，下天橋，再經馬鞍山公園向右方的長堤走去，幾分鐘即可看到烏溪沙沙灘。

至於心形石堆，則要視乎潮水漲退，所以記得出發前，上天文台網站看看潮汐漲退時刻表，作好安排。