釜山首爾追櫻記（十五）：慶州菜包飯似迷你滿漢全席

＊菜包飯既似迷你滿漢全席，又似懷石料理，不同醃菜用小碟仔盛住，放滿整張檯，我計過單係小醃菜有22小碟，另有一鍋牛肉、兩碗湯同埋兩碗白飯！

＊呢鍋牛肉由朋友一個人殺晒。

＊時間尚早，我地兩個客包晒全場。

＊就係呢個阿珠媽主動出擊，叫我地幫襯。

＊門外的相片，影得咁壯觀，但點解我地食的好似唔係咁喎？！

有人講過，來慶州不吃菜包飯和皇南餅，就枉來慶州。所以我地遊完石冰庫後，返回近瞻星台的大陵苑入口，往右邊馬路走，路邊即有多間貼住供應傳統菜包飯的韓式食肆，我地隨意走入其中一間試試地道的菜包飯。

菜包飯的英名叫 Bulgogi Ssambab，既似我地的迷你滿漢全席，又似日本的懷石料理，不同醃菜用小碟仔盛住，放滿整張檯，我計過單係小醃菜有 22 小碟，另有一鍋牛肉、兩碗湯（一碗係海鮮豆腐湯，一碗係青瓜雜菜湯）同埋兩碗白飯，至於最右邊的大大塊菜葉和旁邊的調味醬，（經阿珠媽解釋）原來用來包住牛肉、醃菜和白飯同吃，所以名為「菜包飯」。

不過，我唔食牛肉，由朋友食晒整鍋，我只係不停食醃菜和飲湯撈飯，最後唔夠飽，要添多一碗白飯頂肚。

講真，一來我唔食牛肉，二來全部醃菜都係凍，只有兩碗湯係熱，我唔覺得好好味。不過，既然一場來到慶州，食下地道晚飯就當指定動作吧！

埋單 27,000 韓圜（因為白飯 1,000 韓圜），折合港幣只係190 元左右，不算太貴啦！

傳統韓國菜包飯食店

前往方法：在鄰近瞻星台的大陵苑旁，馬路邊有好多食店，大部分都提供菜包飯料理，大家不妨試試其他店舖。

*沿著大陵苑外牆的小馬路慢慢走，可以欣賞種在路旁的櫻花樹，足足有成條街咁長，行到大馬路，對面就係皇南餅專門店