＊在廣島站旁ASSE百貨公司的廣島燒店食午餐。
＊前面：有蠔的廣島燒；後面：有玉子（煎蛋）的廣島燒，
下面有麵條，兩個都好大餅！
＊廣島市的Outlet－－Festival Outlets Marina Hop，非常冷清。
＊完全無人的outlet，都係第一次見！
＊超級抵又好著的asics運動鞋，原價12,000日圓，特價連稅4,500日圓！
＊本通商店街
＊本通商店街的零食店。
＊繼福岡之行後，又見一蘭拉麵店。可惜要等位，今次無幫趁了。
＊改去街尾的藤原拉麵店。
＊尾道拉麵，600多日圓，好味！
參觀完大和博物館和海上自衛隊吳史料館後，返回廣島站的ASSE百貨公司六樓醫肚（基本上，六樓係我呢次行程主要開餐的地方，呢層有十多廿間餐廳，貨錢相宜，選擇又多！），嘆左廣島名物──廣島燒，一款有蠔，一款係玉子，超級飽肚又好味。然後回酒店稍事休息，黃昏再出動，今次去廣島市的Outlet－－Festival
Outlets Marina Hop。
在廣島站前的巴士Platform 1有廣電巴士3號線可以直達，大約40分鐘坐到尾站就係outlet的所在位置。旅遊資料如此Outlet：廣島Festival Outlets Marina Hop是一間一站式的 Outlets Mall，佔地113,212平方米，全店分7個區域共有約100間商店，是日本中四國地區內最大的Outlets Mall。不過，我地實地直擊的結果是咁的：可能呢個outlet名氣小，店舖亦唔多，加上閒日兼落完雨，基本上無乜遊人，非常荒涼冷清，我懷疑除左我地兩個遊客之外，整個Outlet內唔會多過10個客。幸好裡面有一間ABC Mart運動用品店，我地各自買左一對超抵的asics運動鞋（原價12,000日圓，折實連稅只係4,500日圓，唔使300蚊！）。買完戰利品就急急腳坐番巴士返回廣島市，然後在市內最旺的本通商店街落車。
本通商店街於1950年代已成形，有六十多年歷史，是廣島一條商店較集中的購物街，全長577米，一共分為5個區域，每一個區域都有一個顏色，整條街有大大小小的商店，除左購物外，商店街上仲有唔少特色主題餐廳、甜品店、咖啡店，包括人氣拉麵店一蘭。由於一蘭好多人等位，加上午飯的廣島燒仍然未消化晒，結果我地去左街尾的藤原拉麵，食左碗尾道拉麵做晚餐就算！
廣島Festival Outlets Marina Hop
營業時間：商店、food court上午10:00至晚上8:00，餐廳則由上午11:00至晚上11:00。
地址：日本廣島縣廣島市西區觀音新町4-14
交通：由廣島站出發，乘廣電巴士3號線約37分鐘即可到達（車費250日圓）
廣島本通商店街（Hiroshima Hondoris St.）
前往方法：在廣島市內搭乘路面電車到本通站或者使紙屋町站下車即達。
