俄羅斯西伯利亞之旅（十二）：搭火車往聖彼得堡的烏龍事件

*我地乘坐來回莫斯科至聖彼得堡的遊隼號列車，車程4小時。

*我地坐的經濟位，座位好寬敞又乾淨，似日本的新幹線列車。

*聖彼得堡火車站內。

*4小時的車程，最好買定食物和飲品，在車上慢慢嘆早餐。

*其實車票資料有英俄對照，寫明出發和到達車站的名稱，可惜自己無仔細睇，又信晒網友話莫斯科的列寧格勒火車站就係前往聖彼得堡的火車站。

由莫斯科往聖彼得堡，我地竟然擺左個大烏龍，搵錯火車站，差點錯過火車，嚇到一額汗，超級驚~歸根究底，莫斯科市內實在有太多個火車站，大家千萬要引以為鑑。

在莫斯科逗留一晚後，第二日上午就搭火車往聖彼得堡。最初睇網上資料以為前往聖彼得堡的火車站，就在共產團地鐵站（Комсомо́льская站）上蓋的其中一個名為列寧格勒的火車站（Leningradsky vokzal），於是大安旨意無俾酒店前台職員睇清楚我地列印的車票資料，直接call車前往。

點知到達列寧格勒火車站大堂後，卻搵唔到出發的列車班次，於是問過工作人員，才知係另一個火車站：庫爾斯克火車站（Kurskiy Vokzal），雖然只係搭一個地鐵站，但當時落著大雨，我地四個人擔住遮拖住個大喼上上落落搭搵地鐵站入口，去售票處買票，然後坐一個站，又上上落落兼通過安檢，終於到達Kurskiy Vokzal火車站。幸好我地預早左一個多小時，仍然趕得及準時上車，不過都嚇到身水身汗。

我地坐的是遊隼號列車的經濟客位，整個格局類似日本的新幹線列車，行車穩定又快速，座位舒適寬敞。經過四個小時車程，下午1點幾，就到達聖彼得堡。

俄國鐵路局官方網頁

每日來往莫斯科至聖彼得堡的火車有十多廿班車，由最快4小時至10小時不等。我地來回都係坐車程4小時的遊隼號列車，來回車費大約港幣600元，預售期同樣長達90日。

網址：https://pass.rzd.ru/main-pass/public/en

注意：我地從莫斯科出發聖彼得堡的係庫爾斯克車站（Kurskiy Vokzal），而由聖彼得堡回來，到達的卻是莫斯科的十月車站（Moskva Oktyabr'skaya）。而聖彼得堡的火車站就係Sankt-Peterburg-Glavn. （Moskovskiy Vokzal），大家千祈咪搞錯。