＊脆皮炸雞及辣味炸雞（19,000韓圜）
＊照燒雞（18,000韓圜）
＊免費奉蘿蔔和爆谷。
＊菜單上除唔同口味的炸雞外，仲有佐酒小食，蔬菜欠奉。
＊二樓雅座。
＊店面玻璃放滿一大堆炸雞，引到你口水直流！
有人話炸雞係首爾三大必吃國民美食（仲有就係 Isaac 吐司、姜虎東白丁烤肉）之一，適逢11月4日係小女子生日之喜，一早同老友講明，要學全智賢食炸雞嘆啤酒來慶祝生日，難得另一個老友剛好在首爾公幹，於是晚上約埋一齊嘆炸雞。
Two Two 炸雞店係韓國最大連鎖炸雞店，其中一間分店就在東大門歷史文化公園站 12 號出口附近，店舖門面唔大，樓高兩層。食物種類唔多，主角當然係雞，味道有香辣調味炸雞、脆皮炸雞及辣味炸雞、無骨炸雞、去骨調味炸雞、去骨香辣調味炸雞、大蒜雞、照燒雞等，除此之外，就係下酒小食，都係啖啖肉之類的熱氣小食，奉勸要食得健康之人三思！我地為雞暫且放下健康，揀左三款味道：脆皮炸雞及辣味炸雞（19,000 韓圜）同照燒雞（18,000 韓圜），另加兩杯啤酒和一支汽水。
兩碟炸雞夾埋的份量好多，三個人密密食，最後都要食剩兩件雞！我個人就鍾意有黑色醬汁的照燒雞，味道甜甜地，感覺無咁熱氣；辣味炸雞的醬汁辣中帶甜，融合雞汁與外皮的辣味，香、脆、辣集於一雞！不過，兩個老友反而偏愛脆皮炸雞，外皮金黃酥脆，原汁原味。三個女子邊徒手擦雞邊隊啤酒，感覺好盡興。
埋單，合共 46,000 韓圜，折合約港幣 330 蚊，每人百零蚊，就可以感受到《來自星星的你》中全智賢食炸雞嘆啤酒的滋味，抵！
Two Two炸雞店（둘둘치킨）
地址：首爾市中區乙支路6街23-8號
交通：首爾地鐵東大門歷史公園站12號出口轉左1分鐘直達
營業時間：12:00 ~ 03:00
沒有留言:
張貼留言