暑期曼谷遊（六）：古法泰菜拼盤做午餐

 ＊Sawasdee位於幽靜的President Tower Arcade內，上電梯即見。

＊午餐時分，食客唔多。

 ＊冬蔭功湯：酸中帶微辣，好濃郁。

 ＊四式小食拼盤分量好多，兩人真係食唔晒。

＊炒通菜：新鮮又惹味，唔錯。

拜完四面佛，近近地去Intercontinental Hotel酒店附近商場食古法泰菜。旅遊書話Sawasdee的泰菜出名又抵食，又話呢度的小食拼盤好味，我地叫左四式小食拼盤，再加冬蔭功湯同埋炒通菜做午餐。

下午一點幾鐘，商場好靜，餐廳都好靜，只有三四檯人，我地坐靠窗位置，左右都無人，坐得好舒服。

＊四式小食拼盤（560銖）：分量好多，有多士，春卷，魚餅同苛葉包雞，服務員仲好好咁幫我地拆開荷葉雞兼切好再上碟，好貼心。四款小食味道都唔錯，唔算好油。

＊冬蔭功湯（320銖）：酸中帶微辣，好濃，仲有三隻大蝦，兩人分享剛剛好。

＊炒通菜（260銖）：新鮮又惹味，唔錯。

埋單先知呢度唔收加一服務費，只係收7%稅，真係喜出望外，兩人食左1,200銖左右，即係每人百幾蚊，好抵。

Sawasdee
地址：G/F, President Tower Arcade, 9721 Phloenchit Road
網址：http://sawasdee.co.th/
前往方法：B Chit Lom 站出口步行五分鐘(即Intercontinental Hotel酒店地舖)

暑期曼谷遊（五）：Chivit Chiva Massage 豪嘆四粒鐘

 ＊呢間第二分店在Sukhumvit的一條小橫街內。

 

＊室內裝修以深啡色為主色，感覺雅致。

＊店內的spa套餐好多都有半價優惠。我就係試左第二個，

原價4,400銖，折實只係2,200銖，玩足四粒鐘。

去曼谷，其中一個指定動作就係做spa。上網見呢間按摩店（Chivit Chiva Massage and Spa）裝修得幾骨子，尤其第二分店有半價優惠，在Asok站旁邊，好近酒店，所以姑且一試，揀左四個鐘頭的Spa套餐（Peace In Chivit Chiva），原價4,400銖，半價只係2,200銖。

店內環境好清幽，又新淨，配上深啡色的裝修，好雅致。

五點幾鐘，我地就開始呢個四小時Spa套餐：先到三樓的雙人Spa房焗蒸氣15分鐘（呢間雙人Spa房超大，我諗無1,000呎，都有800呎，設備好齊全，除有兩張按摩床外，仲有一個大按摩池，一個蒸氣浴室，當然唔少得廁所設備，簡直係一條龍服務），然後全身磨砂1個鐘，沖身後，再浸幻彩按摩池15分鐘，雖然要同老友肉帛相見，但真係疲勞盡消，正！）。

做完呢幾部分後，我地落二樓做泰式按摩連草球熱敷90分鐘，舒服到想瞓。做完泰式按摩，再到地下做腳底按摩，連埋頭部及手部，合共1個鐘。全程四個鐘，由同一位按摩師主理，力度適中，有力而不覺痛，真係好舒服。完成後，再奉上一杯好茶同水果，人生最大享受莫過於此。

Chivit Chiva Massage and Spa
地址：16/1-2, Sukhumvit Road, Soi 19, North Klongtoey, Wattana, Bangkok 10110  
註：在Sukhumvit Road 19 街有兩間店，街頭的係第一分店，直行轉左在橫街的係第二分店。
網址：www.chivitchivaspa.com

我地試的套餐：Peace In Chivit Chiva 240 mins
。Shower with Mind & Body Balance Shower gel& Solitude Relieving Hair Shampoo, Body Lotion
。Relaxing Massage ; Head, Hand, Foot （60 mins）
。Ginger Body Scrub（60 mins）
。Steam and Chromo Therapy（30 mins）
。Thai Massage with Herbal Hot Compress（90 mins）

暑期曼谷遊（四）：Lord Jim's海鮮自助午餐 @ Oriental

 ＊由Saphan Taksin站出，在Central Pier有免費Shutter Boat前往文華東方酒店。

 ＊海鮮自助餐Lord Jim's @ Oriental長期爆滿，記得預早訂位。

＊buffet tables唔算好長，但密密麻麻放滿各式各樣美食，質素好高。

 ＊全部甜品款款的式精緻。

 ＊入口即溶的煎鵝肝。

 ＊開邊龍蝦任你食。

 ＊第一碟的海鮮拼盤，食完都飽左一半。鮮蝦超好食！

 ＊精緻甜品食到停唔到口。

 ＊坐靠窗位置，可以睇到昭拍耶河。

原本訂左12點鐘食自助午餐，點知坐昭拍耶河的Express Boat搞到遲大到，好在佢地無取消我地的訂位。

 Lord Jim's 的自助餐超多人幫襯，我預早過幾星期想訂星期六的早午餐都無位，結果退而求其次，係周五享用呢餐高貴的午餐。

近一點去到，整間餐廳坐滿九成人，食客位位都衣冠楚楚，打扮好得體。好在我訂位時，服務員在電郵提醒我，叫我唔好著短褲、T恤、拖鞋同孭背囊，否則就出醜失禮人。

呢間餐廳的buffet tables唔算多，食物種類亦唔係多得好緊要，但質素就超好。自助餐以海鮮同鵝肝最出名，朋友試過鵝肝大讚，話入口即溶，我試左少少，都覺得好溶，果然正。我試左唔同的蝦，肉質紮實味道鮮，開邊龍蝦更加係源源不絕，真係抵讚。仲有即切即做的壽司同刺身，都係必食推介。

甜品方面，都唔可以錯過，款款精緻的式，我一次過食左十款八款，款款都好味。就連生果都甜過人，我同朋友都密密食芒果，因為好甜又無渣，超正！

埋單，1,250銖再10%服務費同7%稅，每人約1,500銖，即港幣四百幾蚊，唔算貴，實在值得一試。

海鮮自助餐 Lord Jim's @ Oriental
費用：周一至周五1,250銖（下午12點至2點半）；周六至日1,650銖（兩個時段：11:30點至1:45分：1:45分至3點）
地址：48,Oriental Avenue, Bangkok
網址：www.mandarinoriental.com
前往方法：BTS Saphan Taksin 站出，在Central Pier有免費Shutter Boat前往

暑期曼谷遊（三）：30銖坐船平遊昭拍耶河

 ＊Central Pier坐滿等船的人，呢度仲有外幣兌換，好方便。

 ＊呢隻就係昭拍耶河快船（Chao Phraya Express Boat）。

 ＊船上座位好快滿，想坐要快手。

 ＊兩岸好多五星級酒店。

＊鄭皇廟。

第二日，由於中午訂左文華東方的海鮮自助午餐，反正要在Saphan Taksin站附近的Central Pier坐船，就決定早少少出發，順道乘坐昭拍耶河快船（Chao Phraya Express Boat）遊遊兩岸風景。

在Central Pier有兩種唔同的船隻，一種係遊客觀光船（Tourist Boat），Day Pass係150銖，另一種係昭拍耶河快船（Chao Phraya Express Boat），全程只係15銖，我地當然揀後者啦，用15銖當遊船河，點計都好抵。

由於旅遊書上只係提及船隻種類同價錢，無提全程幾耐，我地滿心歡喜以為最多半個鐘頭應該會遊畢一程啦，點知原來一程有三十個站，需時要一個小時十分鐘左右，結果由十點半開始，坐完一程已經十一點半有多。跟住，我地再在尾站轉番另一隻船番去，去到文華東方酒店已經係12點45分，真係蝕晒底。

不過，若唔係趕時間，用30銖來回遊昭拍耶河，看看兩岸名勝同風光（如大皇宮、鄭皇廟、唐人街、兩岸的五星級酒店等），其實好寫意，而且真係好超值。不過，大家要注意呢條河的水質超污染，千祈咪俾呢Ｄ泥黃色的河水濺親！


昭拍耶河快船 ( Chao Phraya Express Boat )
費用：單程15銖，共30個站
上船位置：Central Pier（BTS Saphan Taksin站出）
網址：http://www.chaophrayaexpressboat.com/en/home/
註：呢隻船掛著唔同旗幟：無旗、橙色旗、綠色旗同埋黃色旗，各有唔同服務時間，價錢亦有分別，由10銖到32銖不等。

暑期曼谷遊（二）：嘆姐娥中泰菜

 ＊Sukhumvit分店在Asok站步行約十五分鐘。

 ＊周五晚上，人唔多，坐得好鬆動。

 ＊黑胡椒蟹乾炒而成，唔太辣，啖啖肉。

 ＊蝦炒西蘭花。

＊雞肉炒飯。

第一晚到埗，梗係要嘆好野，朋友推介食姐娥酒樓的中泰菜。

姐娥酒樓（Je Ngor Sea Foods）在曼谷有好多間分店，我揀左最近酒店的Sukhumvit分店。我驚多人幫襯，預早在網上訂左位。點知遇上塞車，塞左十幾分鐘，惟有中途落車行去。遲左大半個鐘，好在門口White Board仲見到我地個名，訂檯無被取消！不過周四晚人唔多，只有三成食客左右，坐得好鬆動。

我地點左胡椒蟹，蝦仁炒西蘭花同埋雞肉炒飯。胡椒蟹係呢間店的招牌菜之一，用黑胡椒粒乾炒，無油無汁好乾身，味道唔太辣，蟹肉好新鮮，啖啖肉，果然美味。蝦炒西蘭花係用中蝦炒，蝦肉有蝦味，西蘭花亦唔差。雞肉炒飯就普普通通。埋單約港幣四百幾蚊，兩位來計唔算好貴。

姐娥酒樓（Je Ngor Sea Foods）
地址：Soi  Sukhumvit　20（在Asok站步行約十五分鐘）
網址：http://www.jengorsukhumvit.com/index.php?lang=en&option=home

暑期曼谷遊（一）：住喜來登酒店遇著水患

 ＊Four Points by Sheraton Hotel係Asok站一出，行十分鐘便到，幾方便。

 ＊超大的單人床，各有四呎咁闊。

 ＊浴室雖然大，有浴缸同企缸，可惜企缸門滲水，搞到水禍為患，換左三間房都係無用。

 ＊晨早起身，居然係走廊成灘水，原來係冷氣機天花滴水，真係愈換愈差！

 ＊泳池唔算大，水深只有四呎，啱我呢類唔多識游水的人玩。

 ＊早餐自助餐，種類算幾多。

  
＊餐廳係其中一處可以提供免費WiFi服務的地方，所以晨早流流好多人帶埋電腦，手機上網。


游手好閒的日子，相約舊同學齊齊去曼谷攤抖四日。

今次入住的係Four Points by Sheraton Hotel，因為住兩晚送一晚，四日三夜的套票只係2,900蚊，以暑假而言，價錢唔算貴！

論交通，酒店位於Asok站，一出Sky Train行十分鐘左右即到，沿途有robinson百貨公司同Boots可以逛，都算幾方便。

論設施，酒店走型格路線，今年年頭先開業，所以好新淨。雙人房都幾大間，單人床各自有四呎咁闊，真係碌來碌去都唔驚碌落床，好舒服。其他設施仲有泳池同健身室，泳池唔大，水深只有四呎，勝在唔多人，我游左三日，夾埋撞唔夠十個人，所以細細地都無乜問題。健身室就幾大，又係唔多人，設備亦幾完善。

讚完之後，就要彈佢地的不足之處。首先係WiFi服務，居然咁新的酒店，房間無提供免費無線上網服務，要上網就要俾450銖。若大家想免費上網，只可以在大堂，天台同埋餐廳等公眾地方。一到早餐又或者夜晚時分，大家就齊齊拎住iphone、電腦同ipad落樓玩個夠。

WiFi服務咁孤寒不特止，最令人震驚的的係浴室的企缸門罅滲水，第一日沖完涼，成個浴室好似水浸咁，於是叫佢地換房，由四樓換落二樓。點知第二日晨早沖涼，同樣水浸，最得人驚係居然連房間的冷氣槽天花係咁滴水，滴到大大灘水，於是惟有又投訴。服務員終於無奈咁講，話企缸門罅滲水問題早已存在，而且酒店全部房間都係咁，只係有部分房間比較無咁滲水，雖然佢地都會幫我地換房，但叫我地唔使旨意諗住無事，只係程度上無咁滲水喎。哎，喜來登品牌的酒店，點解連企缸門滲水問題都無發現就開業，而開業後大半年仍未全酒店大執整，真係太令人失望呀。

結果，我地再搬過另一間房之後，為免沖完涼水浸眼眉，只好在企缸的裡裡外外鋪滿毛巾，減少滲水情況。


Four Points by Sheraton Hotel

Bangkok, Sukhumvit 15

網上訂房（大約900港元一晚）：透過Agoda網上預訂Four Points by Sheraton

地址：Sukhumvit 15（在ASOK站的rOBINSON百貨出口，步行約十分鐘便到。）

網址：http://www.starwoodhotels.com/fourpoints/property/overview/index.html?language=en_US&propertyID=3409

＊按摩店位於39街的橫街內，幾易搵，外觀好骨子。

 ＊門外有價目表，一目了然，價錢好相宜。

 ＊做完按摩，可以飲番杯有機果汁。80銖唔算貴。

＊有按摩用品出售。

今次行程揀左三間按摩店，前兩晚都係幫襯開的center Point同埋Asia Herb，第三晚試試胡慧沖介紹的新按摩店。

呢間位於Phra Phrom站的Vanilla按摩店，勝在就腳，做完按摩可以去Emporium血拚一番。

按摩店位於39街的橫街內，幾易搵，外觀好骨子，室內裝修亦雅致，放滿晒按摩產品任你揀，而且有有機果汁售賣，做完按摩大可以飲番杯先走。門外已有價目表，一目了然，價錢唔貴，腳底按摩一小時300銖，兩小時500銖，仲可以用埋9折優惠券。

我地做一小時腳底按摩，係二樓進行，黃昏六點，環境幾靜！做做下直頭都訓著左添。我的按摩師係一個妹妹仔，原以為佢咁年輕，一定唔夠班，點知一按便知龍與鳳，力度適中之餘，仲按得好舒服，尤其最後按肩頸的幾分鐘，真係超正。

埋單折實只係270銖，抵。

Vanilla Relaxation & Wellness Complex
地址：10/9-10 Soi Sukhumvit 39, Sukhumvit Rd.,Klongton Nua, Wattana, Bangkok 10110
02-260-2787-8
10:00am to 10:00pm
Latest reception:8:00pm

網址：http://www.bkk-gallery.com/vanilla/english/index.shtml

新年曼谷遊（四）：新年流流搵鬼玩

＊遠遠見到一個好似大大個紫色長形的建築物，加上門口有大大隻鬼爪迎接我地，就知道已到達傳說中的鬼屋商場。

 ＊廢墟布置無乜特別。

 ＊又係廢墟布置。

＊中午時份，商場無乜商店營業。

＊我地買左12點半的一場，開始探險之旅。

為左唔想咁悶淨係行街按摩，今次搞搞新意思，年初二去鬼屋商場Mansion 7一遊，順便去見識商場內的鬼屋。

由地鐵 Huay Kwang站一出，轉右直行約五分鐘即到，都幾方便（不過其實我地係問人先識行！）。

遠遠見到一個好似大大個紫色長形的建築物，加上門口有大大隻鬼爪迎接我地，就知道已到達傳說中的鬼屋商場。中午12點左右，一眼望晒，實在無乜店舖可行，加上幾間食肆都未開門，感覺有少少搵笨。

我地惟有買飛入鬼屋（票價180銖，每半小時入場）。我地買左12點半的一場，同埋五位泰國妹妹仔（應該係初中生）齊齊探險。一入到鬼屋，有一個唔人唔鬼的鬼僕黑麻麻企係度，嚇鬼死人！佢先安排我地睇一段有英語字幕的短片，講解呢間鬼屋前身係醫院，裡面有Ｄ乜東東，講得都幾恐怖，搞到妹妹仔叫到拆天，仲驚到坐埋落我地大髀度。最後鬼僕有幾句忠告，但我地聽唔明，好在其中一個妹妹仔翻譯俾我地聽，話四人一組，拉住繩子慢慢行，只可以前行，唔可以後退，若唔敢再行，只能留在原地，等工作人員帶番出去。

我地同另外兩個妹妹仔四人一組，拉住繩子開始行。呢度的氣氛實在太恐怖，朋友行左分零鐘已經放棄，要由鬼僕帶番出去。我就同兩位妹妹仔繼續探險，佢地在前，我在最後，其實愈行愈驚，加上以前睇得太多泰國鬼片，真係好驚，尤其當中有些時候全黑一片，好驚有真鬼假鬼撲出來。雖然心裡面猛同自己講係疑心生暗鬼，但當有人扮假鬼出來時，嚇到叫破喉嚨！好耐都無試過嗌得咁緊要，真係打從心底裡嗌出來！行到中途想走都無用，因為若自己一個人停留原位等人帶走，齋等都嚇死，我寧願硬著頭皮跟妹妹仔共同進退。

結果15分鐘的探險，最後以嗌破喉嚨告終～呢個大年初二搵鬼玩的玩意真係嚇破膽。

Mansion 7
網址：www.themansion7.com
地址：244/7 Ratchadaphisek Road,Bangkok
開放時間：Open：Sunday to Thursday, noon-midnight／Friday/Saturday, noon-2 a.m.
MRT：Huay Kwang（轉右直行五分鐘即到）

新年曼谷遊（三）：扮唐人街的China White

 ＊China White係其中一間獲傳媒甚至胡慧沖報道的中菜小店。

 ＊中式掛燈，木檯木椅，布置古色古香。

 ＊天外天劇院，仲唔似唐人街！

 ＊另一張中式掛畫。

＊餐前送上一缽花生俾你慢慢剝！

 ＊雞肉炒麵芡汁太杰，勁似唐人街味精菜式。炒芥蘭似一人份量，少得可憐。

 ＊鐵板蠔餅的蠔仔好肥美，脹卜卜，熱辣辣，絕對係超值推介。

 ＊炸蝦卷脆口但太熱氣。

＊酸梅汁將一粒碎左的鹹酸梅放上面，俾你攪勻慢慢飲，好似鹹檸七咁。

出發前做定功課，知道商場開左唔少新食肆，China White係其中一間獲廣泛報道的中菜小店。

呢間小店裝修扮晒唐人街咁，好多中式懷舊布置，好似牆上的舊照片、中式掛燈、平檯木椅咁，就連餐牌都用中英對照，幾有gimmick。

食物方面，我地叫左雞肉炒麵、鐵板蠔餅、炒芥蘭，同埋兩杯酸梅汁。點知送上來時先發現碟碟size細得可憐，好似一份量咁，就算我朋友細食，都覺得唔夠食，再加多炸蝦卷。

。雞肉炒麵：芡汁太杰，麵太少，雞肉太鞋，直頭同我當年去英國唐人街食的中菜一樣，好麻麻。
。炒芥蘭：少得可憐，一個人食都嫌少，味道好普通。

。鐵板蠔餅：最好味的一碟，蠔仔好肥美，脹卜卜，熱辣辣，絕對係超值推介。

。炸蝦卷：以為係卷狀，但點知係一堆堆，脆口但太熱氣。

。酸梅汁：好好飲，唔同香港飲到的酸梅汁，呢度係將一粒碎左的鹹酸梅放上面，俾你攪勻慢慢飲，好似鹹檸七咁，算係誠意之作。

埋單呢餐其實唔貴，唔使300銖，但整體味道一般，gimmick大於一切。

China White
The Central World Plaza 3 rd Floor,
Rajdamri Rd,Patumwan, BKK, 10330