RBTea嘆甜品兼傾偈都唔錯

＊呢個香蕉雪糕窩夫要五十幾蚊。味道唔錯。

＊朋友的岩鹽下的焦糖咖啡，佢話有少少鹹，仲講笑話有初戀感覺！（千祈咪信）

＊我呢杯抹茶紅豆雪糕好好飲但好邪惡，而且唔平，五十幾蚊。

＊另一個朋友的鮮水果茶，熱飲，佢話唔錯。

上星期四晚，在旺角滾水淥腳食完晚飯後，意猶未盡，於是轉戰太子，在始創中心搵左呢間小店繼續傾偈兼食甜品。

小店採取自助形式，自己搵完位，再自己去門口落單。不過就有侍應送食物來。

我地三個人，各叫一杯飲品，另加一個窩夫做甜品，埋單190蚊，以輕食同飲品價錢來計，完全唔便宜。不過，甜品同飲品質素好唔錯。我尤其鍾意自己嗌個杯抹茶紅豆雪糕沙冰，紅豆腍綠茶味適中，加上沙冰做底，好濃郁，不過就肯定肥爆。至於窩夫，都好大埋頭，而且奉上來時都微暖，應該係即叫即做，食落若可以再脆身Ｄ就仲正。其中一個朋友叫左杯埋在岩鹽下的咖啡（全名長到嘔，而且岩鹽又唔知乜東東，英文叫salted chesse），不過佢話幾好飲，有極微鹹味仲有初戀的感覺，我就覺得純粹搞笑多Ｄ啦！另一個朋友的鮮水果茶幾骨子，佢話都好飲。

總結而言，飲品和食物水準唔錯，而且我地有八點幾一直坐到十點，傾偈都傾得幾舒服，四周人聲唔太嘈，所以都算係傾偈同食輕食的好地方。

RBTea
地址：太子彌敦道750號始創中心2樓232號舖