首爾冬遊記（十七）：明洞全州中央會館獨食石鍋飯加大醬湯

 ＊我地由二樓側門進入店內。最初以為呢個活動公仔係真人，嚇得我地丫！

 ＊餐牌中英韓日文均有，而且有圖片可以睇，唔驚唔識叫。

 ＊美味的豬肉石鍋飯，一個人食晒，旁邊的冷菜亦掃清光，仲要添加泡菜兩次！

 ＊濃郁的大醬湯唔合朋友的口胃，結果我捨命飲晒落肚，

兼且食左幾啖白飯送湯添！呢勻真係變大胃王！

＊由正門出番去明洞，就見到會館的宣傳大叔！

由南山玻璃升降機原路下山回明洞，居然俾我發現旅遊書推介的全州中央會館明洞總店，梗係要幫襯食番碗石鍋飯啦！

朋友因為腸胃唔舒服，無乜胃口，原本打算我食豬肉石鍋飯，佢飲大醬湯。

豬肉石鍋飯（10,000韓元）新鮮熱辣送上，經我快速攪拌後，飯餸撈埋一堆後，香味勁濃帶微辣，密密食到停唔到口，真係無得頂！

輪到更為濃郁的大醬湯（7,000韓元）上場，可惜朋友完全無胃口，只能夠飲石鍋飯送的大豆芽清湯，而我只好捨命飲埋成碗大醬湯，湯料好多，用鮮蝦、蜆等海鮮熬製，一飲之下，哇，真係不得了，超級濃郁！不過，有少少鹹，我再用附送的白飯撈湯，中和鹹味，更覺滋味！

食完石鍋飯，又飲完大醬湯，我仲食晒所有五六碟冷菜，居然剛剛好，無飽到上心口的感覺！估唔到來左首爾，我變左大胃王添！

一個人食左17,000韓元，完全值得回味！
 

全州中央會館前往方法：
地鐵明洞站6號出口步行約3分鐘（不過若好似我地咁去搵南山升降機時，就會發現對面馬路有呢間店的二樓側門入口。）

全州中央會館石鍋飯95折優惠券：
http://www.konest.com/contents/gourmet_mise_map.html?id=1485